الحق القطة اتكلمت

 احنا بنسمع كتير لن القطط بتكون معفرتة، يعني ايه معفرتة؟

حقول للك بس الصبر مفتاح الفرج يا أيها المستمع الصغير، في أساطير بتقول ان الجن بتدخل في أجساد القطط، ومن اجل ذالك غير مستحب ضرب القطط واذيتهم، وانا بتصفح على الفيس شدتني قصة فطة من القطط المعفرتة د ل٧ اهي لكاتب جميل مسني نفسه دافنشي، اسمعها للآخر وانت ساكت ولو عجبتك حنقل لك كل قصصه وابداعاته. 

_ مياااااو

= مالك يا بوسي 

_ مياااااو مياااااو

= انتي جعانة ؟

_ يا غبي مياااااااو

= عايزة تسمعي حاجة لاحمد سعد ؟

_ اقعد يا ابراهيم عايزك في كلمتين 

= إيه دا، اللي انا سمعته دا صح، انتي بتتكلمي يا بوسي ؟

_ يا ابني ما انا لسه قايلك يا غبي من شوية 

= ملفتتش نظري خالص

_ عشان مش جديدة عليك غالبا 

= انتي ازاي بتتكلمي يا بوسي

_ أنا مش بوسي يا ابراهيم

= أمال نورا ؟

_ أنا مش قطة أصلا

= أمال انتي مين 

_ كائن تاني خالص، ومش فيميل يا ابراهيم، انا دكر زيي زيك 

= بجد ؟

_ أيوه، وهحاسبك على القطط الدكورة اللي كنت بتجيبهملي بس بعدين 

= ما انا كنت عايز افرح بيكي واشيل قططك يا بوسي 

_ افرح بيا وكل حاجة، بس ليه افترضت اني نتاية 

= مش عارف بس حسيت 

_ هي دي فيها إحساس، لا والقط اللي كنت بتجيبهولي غبي زيك، عنده تارجت وهيخلصه هيخلصه، مش فارق مع أمه حاجة 

= حقك عليا يا ابو الكباتن، بس ممكن تفهمني انت مين ومتنكر في قطة ليه، انت مباحث ؟

_ والله العظيم اخربشك في حتة متحبش حد يخربشك فيها 

= أمال انت مين ؟

_ انا ابن ملك ملوك الجن

= سمو الأمير، والله ما كنت اعرف، اجيب لسيادتك تورتة فواكه ؟

_ لا مش عايز قرف يا ابراهيم، اقعد عشان تفهم 

= ميصحش يا افندم 

_ ابراهيم بقولك اقعد، امك لو طلعت من المطبخ دلوقتي وشافتك وانت واقف انتباه لقطة سيامي هتقول عليك بتضرب استروكس أو عندك زوفيليا 

= طب فهمني بس ايه اللي حصل معاك عمل فيك كدا 

_ انا كنت عايش حياة الملوك في القبيلة بتاعتنا، العربية الشبح، الشوكة الدهب، بقضي الصيف كله في راس شيطان 

= ولي العهد بقى 

_ لحد ما حبيت بنت من عامة الشعب، كانت عايشة في حمام عمومي في عبد المنعم رياض 

= الحمام اللي في الموقف ؟

_ ايوه انت عارفه 

= دخلت هناك كتير، بس كان فيه حاجة غريبة بتحصلي هناك عمري ما فهمتها 

_ ايه ؟

= كان فيه حد بيقرصني من فخادي 

_ هاهاها، ايوه هي اللي بتعمل الحركات دي، مجرمة بتعشق المقالب، بتموت في رامز جلال، بس من رمضان اللي فات وهي بتحب ياسر أكتر 

= طب وحضرتك ما اتجوزتهاش ليه بقى ؟

_ بابا الملك رفض، ولما اتحديته غضب عليا وسخطني قطة، والعيال ربطوني بحبل من رقبتي وبهدلوني 

= ايوه فاكر، وانا خدتك منهم وحميتك وكنت بأكلك سردين 

_ حصل 

= وكنت بجيبلك لانشون

_ ربنا يخليك يا ابراهيم 

= ولبن، كنت بشتريلك لبن 

_ ما خلاص يا ابراهيم انت بتعايرني ؟

= لا يا باشا العفو، انا بس بفكرك عشان عارف ان ذاكرة القطط بعافية يعني 

_ يا ابني ما قولتلك مش قطة انا 

= يعني انت خلاص هترجع عفريت تاني ؟

_ النهارده اخر يوم ليا كقطة، ابويا خلاص سامحني وبعتلي حد يبلغني انه رضي عني 

= لا مؤاخذة في السؤال بعتلك مين ؟

_ الست اللي كانت طالعة عيادة الدكتور اللي فوقنا ووقفت تلعب معايه شوية 

= اللي كنت عايز اشقطها ؟ هي طلعت تبعكم ؟

_ اه عفريتة، وبايسكشوال على فكرة يعني ممكن تمرمطك 

= عالعموم يعني هتوحشني، ابقى اسأل عليا بقى لما ترجع حياتك تاني

_ لا يا ابراهيم انا مش همشي قبل ما اردلك الجميل، انت آويتني في بيتك، أكلتني واهتميت بيا، صحيح كنت بتسمعني حاجات غريبة بس برضو كتر خيرك

= لا يا باشا دا الواجب، جميل ايه بس 

_ مفيش الكلام دا، هحققلك اي طلب تطلبه قبل ما ارجع 

= أي طلب أي طلب ؟

_ اسرح بخيالك وفاجئني 

= طب انا عايز تُمن كيلو لحمة دلوقتي 

_ هتعمل ايه بتُمن لحمة يا ابراهيم ؟ هتلفه على سيجارتين ؟ هو دا سقف خيالك يا ميديوكر ؟

= طب بص انا فيه حاجة نفسي فيها من زمان بس مش عارف هتعرف تحققهالي وللا لا 

_ أكيد هعرف انا مش عويل زيك 

= نفسي ابقى مو صلاح 

_ تبقى مو صلاح ازاي يعني ؟ عايز تبقى زيه ؟

= لا عايز ابقى هو، تبدلني معاه يعني 

_ سهلة، وهجيبهولك هو هنا يقعد يتفرج على لميس الحديدي مفيش مشكلة 

= بس بقولك ايه، اوعى تحولني لمحمد صلاح وهو لسه في المقاولين، انا مش هعيش قصة الصعود دي من الأول 

_ لأ متقلقش، من بكرا هتبقى محمد صلاح في نسخته الحالية 

= يعني انا هقبض 20 مليون استرليني وهصيف في المالديف وصورتي هتبقى في كل حتة

_ اه، صورتك هتتحط على السايبرات والقهاوي

= والبنات هتحبني بقى وتموت عليا، وجسمي هيبقى حلو ؟

_ واتحاد الكورة المصري هيصرفلك 5000 جنيه، دلع نفسك 

= طب يالا حولني صلاح فورا، بسرعة عشان مكة عندها مدرسة الصبح

_ بس فيه حاجة مهمة لازم تكون عارفها قبل ما احولك 

= ايه بقى ؟

_ انت هتعيش حياة محمد صلاح مش حياتك انت 

= ايوه ما هو دا اللي انا عايزه 

_ أكلك هيتحسب بالجرام من هنا ورايح، ولو نفسك راحت لصباع محشي ومديت ايدك عليه، هتفضل تجري لحد ما تحرقه

= مش مهم المحشي 

_ هتعيش على الأكل الصحي، وهتنام بدري مش هينفع تسهر طبعا 

= انام بدري ليه ؟

_ عشان هتصحى بدري 

= ماشي هحاول اعمل كدا 

_ مش كدا بس، انت طول الوقت هتتمرن عشان تحافظ على لياقتك، الرياضة هتكون شيء أساسي في حياتك 

= ماشي 

_ لو جيت مصر في يوم وفكرت تقف تشم هوا عالكورنيش مثلا، هتموت متداس تحت أقدام الجماهير 

= ليه 

_ عشان بيحبوك 

= يخربيت دا حب 

_ مفيش حاجة اسمها حياتك الشخصية، الناس هتنخربلك في كل تفاصيلك، وتقعد تتكلم على مراتك وتجيب سيرة بناتك 

= يا ساتر يا رب 

_ اي موقف هتعمله هتتهاجم عليه، اتكلمت، سكت، اتبرعت، رفعت بوست، هتتهاجم وهتتشتم وهيتفتش في نيتك 

= لا انا مبحبش حد يفتش في نيتي 

_ وهيتقال عليك مغرور ونسيت أصلك، وهيطلعلك عيل فاشل مشافش نجاح في حياته غير نجاح الموجي، يتنمر عليك ويقول عليك كتفو

= كل دا ؟

_ واكتر، الكاميرات هتطاردك في كل مكان تروحه، محدش هيحترم خصوصية اللحظة اللي انت فيها، حتى لو كنت في عزا، مش هيسيبوك في حالك 

= يا لهوي يا اما 

_ وناس قاعدة على القهوة متعرفش حاجة عن كل دا بيحسبوا مرتبك وأرباح الإعلانات بتاعتك وبيعدوا عليك كل جنيه بتكسبه 

= دول تبع الجهاز المركزي للمحاسبات ؟

_ لا دي هواية عندهم مش اكتر 

= ايه المرار دا يا عم، أنا كنت عايز ابقى محمد صلاح عشان انبسط بحياته، مفكرتش في كل الهم دا 

_ ما هو انت لما بتشوف واحدة حلوة ماشية في الشارع عينك بتقع بس على وسطها ملفوف ازاي، سمانتها مقلوظة ازاي، مبتفكرش هي عندها امراض ايه، شايلة هم مين، مديونة وللا لا 

= قصدك تقول ايه ؟

_ عايز اقولك لما تعجبك حياة حد شيل شيلته كلها، متنقيش منها اللي عاجبك بس .

#داڤنشي_Davinci

#الاصطباحة_Estba7a