أكثر نبي اتذكر اسمه في القرآن 136 مرة
النبي اللي ربنا خصه وميزه بانه " كليم الله " دون وسيط أو وحي من جبريل ...
النبي اللي ربنا قال عنه ( وألقيت عليك محبة مني) يعني وضع في وشه القبول كل اللي يشوفه يحبه
النبي الوحيد اللي ربنا قال عنه ( ولتصنع على عيني ) ... يعني تربيته ونشأته وتعليمه ونضوج شخصيته كلها كانت بترتيب إلهي وبصناعة إلهية
إنه كَليمُ الله سيدنا موسى عليه السلام
وكلم اللَّهُ مُوسَى تَكْلِيمً-
-----------------------------------
- ونبدأ نتكلم عن الفترة الأولى من حياة سيدنا موسى
: منذ ولادته لحد ما بقى عمره 30 سنة .... ودي قضاها سيدنا موسى بين قصر فرعون وبين بيوت بني إسرائيل ، ما بين أمه وبين آسيا زوجة فرعون .
وقبل ما نبدأ هفكرك إن سيدنا موسى جه بعد سيدنا يوسف ب 330 سنة ....
( وَلَقَدْ جَاءَكُمْ يُوسُفُ مِنْ قَبْلُ بِالْبَيِّنَاتِ فَمَا زِلْتُمْ فِي شَكٍّ مِمَّا جَاءَكُمْ بِهِ ۖ حَتَّىٰ إِذَا هَلَكَ قُلْتُمْ لَنْ يَبْعَثَ اللَّهُ مِنْ بَعْدِهِ رَسُولًا )
الفترة الزمنية بين سيدنا يوسف وسيدنا موسى كانت كبيرة للدرجة اللي خلت الناس تقول خلاص ربنا مش هيبعت أنبياء تاني.
🍀🍀🍀🍁🍁🍁🌼🌼🌼
المشهد الأول ....
من سيرة سيدنا موسى
الزمان : في الأسرة ال19 من أسر الفراعنة في عهد رمسيس التاني ...
في الفترة بين 1391 - 1271 قبل الميلاد
المكان : مصر ....
في يوم من الأيام نام فرعون مصر ... وحلم بكابوس ...
ان فيه نار خرجت من بيت المقدس ، وصعدت للسماء ، وبعدين توجهت لمصر وحرقت قصر فرعون
قام فرعون من النوم مفزوع ، وجاب كل المفسرين يفسروله حلمه لكن محدش عرف يفسره
** ملحوظة : ( فرعون ده لقب لحاكم مصر وقتها ومكنش اسم ) ... لكن في فترة سيدنا يوسف الحاكم كان اسمه ملك ، لذلك في قصة سيدنا يوسف كان القرآن ألفاظه دقيقة وذكر الحاكم بالملك.
حلم فرعون تاني بنفس الكابوس ...
قرر يجيب المرادي كل الكهنة ....
لحد ما كاهن قاله ان فيه نبوئة بيرددها الناس في بني اسرائيل ان ربنا أخبر سيدنا ابراهيم ان فيه نبي هيتولد بينهم هتكون نهاية ملك فرعون على ايده ( وما زالوا بيتوارثوا القصة دي من أجدادهم وفي انتظار النبي ده )
غضب فرعون غضب شديد من التفسير ده ، وحس بالخوف من زوال ملكه
فأصدر أمرين ....
الأمر الأول :
جمع كل المقبلات في البلد ( المقبلة هي المرأة التي تولد ) .... وأمرهم انهم يبلغوا عن أي مولود ذكر ، عشان جنود فرعون يقتلوه .... وهتكون ليها مكافأة عظيمة ...
واللي هتكتم وتداري خبر ولادة أي ذكر هيتم قتلها
الأمر الثاني : أمر فرعون جنوده بتفتيش جميع بيوت بني اسرائيل ، وأي مولود ذكر يقتلوه بقطع رأسه وسط صراخ واستسلام الأهالي ... واستمر القتل لمدة عام ، لحد ما نصحه أحد التابعين ليه بالتوقف عن القتل لمدة عام ، حتى لا ينقطع نسل بني اسرائيل وتتوقف خدمتهم ... لإنهم كانوا عبيد لفرعون وقتها
قتل فرعون بسبب النبوئة دي ما يزيد عن 100 ألف طفل.
🍀🍀🍀🍁🍁🍁🌼🌼🌼
المشهد الثاني .... 🎬🎥📹
تحمل زوجة عمران ابن لاوي ابن يعقوب ابن اسحاق ابن ابراهيم عليهم جميعا السلام ....
في كل مرة بنسمع قصة النبي موسى بنركز ايه اللي هيحصل للنبي موسى ، وهيعمل ايه مع فرعون ...
بس فيه مشهد حلو جدا لأم موسى ده اللي لازم ناخد بالنا منه ... 😊
ربنا أوحى لأم موسى انها لو خافت علي موسى - ابنها الرضيع - من جنود فرعون أن تلقيه فى البحر ....
قال تعالى "وأوحينا الى أم موسى ان أرضعيه فاذا خفت عليه فألقيه فى اليم"
ايه الابتلاء ده ؟؟!!!
ده أي أم دلوقتي بتخاف تملى البانيو بالميه وتسيب ابنها فيه ... 😕
أي أم لو ماشيه في المول وبصت وراها لحظة ملقتش ابنها بتصوت ، ونفسها بيتقطع والدنيا بتلف بيها لحد ما يظهر تاني😕😕
وأم موسى هتحط ابنها فى البحر المفتوح ممكن ميستمرش في الطفو ، وممكن فى لحظة يتقلب أو يغرق بسهولة !
# العجيب فعلا ان تكملة الآية بتقول ..
" ولا تخافى ولا تحزنى " ...
طب ليه متخافش ومتحزنش ؟؟؟
أصل لو أم موسى خافت والحزن تملكها وانهارت من البكاء بعد ما سابته فى البحر جنود فرعون أول ما هيشوفوها هيعرفوا ان فيه سبب وراء بكاءها وحزنها .....
وهيبحثوا ويلاقوا الطفل ويقتلوه ....
لأن كان فيه بشارة في بني اسرائيل وقتها ان فيه مولود هيتولد لما يكبر هينزع الملك من فرعون فأصدر أوامر بقتل كل مولود في الوقت ده ..
فكان جزء من الحل للمشكلة انها متخافش ومتعيطش وتهدى وتثق بوعد الله .... " إنا رادوه اليك وجاعلوه من المرسلين "
# تخيل لو ربنا قال لأم موسى ان ابنك البحر هيوديه لقصر فرعون.. آخر مكان فى العالم ممكن تتمنى ان ابنها يكون فيه .. أكيد كانت هيتملكها الخوف والحزن ..
وتقول لنفسها ابنى رايح عند اللى أنا عايزه اخبيه منه فيفضحها الخوف والفزع ..😢😕
ربنا برحمته لم يخبر أم موسى عليه السلام بالتفاصيل المستقبلية اللى هتحصل ....
وربنا يدبر الأمر بعلمه تدبير قد لا نفهمه فى حينها ...
وربنا لا يخلف وعده أبدا ...
ليه ربنا سبحانه وتعالى أمر أم موسى انها ترضعه ( أن ارضعيه) ؟؟
لإن الطفل لما يدوق لبن الأم يرفض أي لبن تاني ... ويشتاق للبن الأم اللي داقه أول مرة لذلك قوله تعالى ( وحرمنا عليه المراضع ) عشان تيجي أمه وتقوم برضاعته فيرضى
-----------------------------------
{ وَأَوْحَيْنَا إِلَىٰ أُمِّ مُوسَىٰ أَنْ أَرْضِعِيهِ ۖ فَإِذَا خِفْتِ عَلَيْهِ فَأَلْقِيهِ فِي الْيَمِّ وَلَا تَخَافِي وَلَا تَحْزَنِي ۖ إِنَّا رَادُّوهُ إِلَيْكِ وَجَاعِلُوهُ مِنَ الْمُرْسَلِينَ}
في الآية دي أمرين : أرضعيه ، ألقيه في اليم
نهيين : لا تخافي ، ولا تحزني
وعدين : إنا رادوه إليك ، وجاعلوه من المرسلين
أحيانا الحزن بيبقى هيقضي علينا ....
لكن لما بنتماسك ونبدل الخوف باطمئنان وتوكل على الله وثقة في قدرته وحكمته وانه هيعوضنا آجلا أم عاجلا ... ساعتها بس بنستاهل عوض ربنا الجميل
﴿ وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ ﴾
🍀🍀🍀🍁🍁🍁🌼🌼🌼
المشهد الثالث .... 🎬🎥📹
يمشي التابوت في النيل ....
لحد ما يقف بإرادة ربنا أمام قصر فرعون بعد ما يصطدم بأشجار القصر....
لحد ما يشوف التابوت وصيفات القصر ،
فيوصل الخبر أولا لآسيا زوجة فرعون قبل ما يوصل لفرعون.....
تقول الوصيفات للملكة :
تعالي يا مولاتي ، فيه طفل شديد الجمال في تابوت أمام القصر
تسأل الملكة :
ايه اللي جابه هنا ؟!
فترد الوصيفات انه أحد الامهات رمته في النيل ، بس خبط في أشجار تابعة للقصر ووقف هنا
تشوفه الملكة فيضع الله القبول في قلبها ، وده ترتيب إلهي وحفظ إلهي ...
أول ما تشوفه تحبه وتقرر تسميه موسى ....
موسى بالمصرية القديمة معناها المُلتَقط من الماء ،
(مو) هي الماء ، و(سى) هي المُلتقَط ...
معناها ابن الماء
وهي اللي سمته لأن أمه الحقيقية أمام الناس هي مرضعته ، لا تملك تسميته
-----------------------------------
يسمع الخبر فرعون ووزيره وجنوده فيجوا غضبانين ....
فتبكي آسيا زوجة فرعون وتترجاهم ميقتلوش الطفل ...
( وَقَالَتِ ٱمْرَأَتُ فِرْعَوْنَ قُرَّتُ عَيْنٍۢ لِّى وَلَكَ ۖ لَا تَقْتُلُوهُ عَسَىٰٓ أَن يَنفَعَنَآ أَوْ نَتَّخِذَهُۥ وَلَدًا وَهُمْ لَا يَشْعُرُونَ )
قرت عيني لي ولك : يعني ابقيه ليا وليك تقر بيه أعيننا ، وده بيدل انها شافت فيه من الملامح الجميلة ما يليق بابن لهم يعيش في القصور
عسى أن ينفعنا : نخليه خادم لينا من خدم القصر
أو نتخذه ولدا : نرقية منزلة أعلى ، فيبقى ابن لينا وعوض عن عدم الخلفة ... وده كان قدر ربنا ليه انها حبته حب شديد لدرجة انها اعتبرته ابن ليها
وهم لا يشعرون :
يعني استجاب فرعون وهامان وجنوده لطلبها بدون مقاومة ، بحفظ الله لموسى ...
السفاح اللي قتل 100 ألف طفل فجأة رق قلبه لطلب زوجته وهم مسلوبين الارادة مش حاسين بأي غضب ....
وهم لايشعرون ان نهايتهم هتكون على ايده
وده بيدل ان ربنا لو شاء انه يحفظك ويرعاك .... بيسبب الأسباب ومستحيل أي حد يقدر يأذيك
وزي ما بيقول الشاعر ....
إذا لم تصادف في بنيك عناية ... من الله خاب الراجي والمؤمل
فموسى الذي رباه جبريل كافر ... وموسى الذي رباه فرعون مرسل
-----------------------------------
في المساء يرجع سيدنا موسى لحضن أمه ،
لما رفض موسى الرضيع يأخد أي ثدي غير ثدي أمه ،
أخته كانت واقفة معاهم وقالت ( هل أدلكم على أهل بيت يكفلونه ) ، فلما أرسلوا معاها البشير وشافوا قدرة المرضعة ( أمه ) انها تسكت الطفل فرحوا بيها ، وخدوها معاهم القصر
فشاء الله أن ترضعه .... جهرا
وتأخذ على رضاعته .... أجرا
وتكون كأمه وهي أمه ... قدرا
وتسكن مع ابنها ..... قصرا
ربنا بيقول :
" فرددناه الى أمه كى تقر عينها ولا تحزن "..
ربنا رحيم ... لا يرضى إن أم موسى تبكى وتحزن ..
تكملة الاية " ولتعلم أن وعد الله حق "
لو الدنيا كركبت عليك .... متبكيش ..... ثق في ربنا ، طالما وثقت في حكمته ورحمته هيخرجك من كل كرب ... التماسك جزء من الحل للمشكلة ....
عدم اظهار الحزن والصبر هم مفاتيح الفرج ...
توكل على الله وثق بوعده
ربنا لما وصف قلب الأم عموما ..
وصف قلب أم موسى تحديدا بقوله ( فأصبح فؤاد أم موسى فارغا ) يعني فاضي من كل حاجة في الدنيا ومن كل هم ومن كل حب إلا هم موسى وحب موسى وخوفها على موسى ..
تخيل أم ياخدوا منها ضناها اللي بتحبه بكل ذرة فيها ...
من غير ابنها قلبها هيبقى فاضي ...
فارغ زي ما ربنا بيقول لا بيحب ولا بيكره
ممكن أم تستحمل شر يحصل لأبوها وأمها واخواتها وجوزها ، لكن متستحملش شعرة تمس ابنها
قلب أم موسى اللي كان ملئ بفرحة ولادة موسى ، أصبح فارغا من شدة الحزن والألم لفراق الطفل الرضيع موسى ...
ربنا بيوصف بعد كده الطمأنينة اللي جازى بيها أم موسى لما صبرت ووثقت في حكمة ربنا فقال ( لولا أن ربطنا على قلبها لتكون من المؤمنين ) ... يعني ربنا صبرها وثبتها على الايمان وقت الشدة ...
فاللهم أربط على قلوبنا كي لا نحزن
وألهمنا الصبر والثبات ...
اللهم آمين
" من أخفى عن الناس همه متوكلا على الله ، كفاه الله ما أهمه وأرضاه "
🍀🍀🍀🍁🍁🍁🌼🌼🌼
المشهد الرابع .... 🎬🎥📹 ( وَلِتُصْنَعَ عَلَىٰ عَيْنِىٓ )
ربنا سبحانه وتعالى بيقول : ( أَنِ ٱقْذِفِيهِ فِى ٱلتَّابُوتِ فَٱقْذِفِيهِ فِى ٱلْيَمِّ فَلْيُلْقِهِ ٱلْيَمُّ بِٱلسَّاحِلِ يَأْخُذْهُ عَدُوٌّ لِّى وَعَدُوٌّ لَّهُۥ ۚ وَأَلْقَيْتُ عَلَيْكَ مَحَبَّةً مِّنِّى وَلِتُصْنَعَ عَلَىٰ عَيْنِىٓ )
يعني ايه ولتصنع على عيني ؟؟
يعني ربنا سبحانه وتعالى كان عايز سيدنا موسى يبقى ليه شخصية القائد ....
القائد الشجاع اللي هيقف لوحده قصاد طاغية وظالم اتعرف بانه من أشد الطغاة في التاريخ ....
فمرحلة نشأة سيدنا موسى ، وتكوين شخصيته ، ونضجها واكتمالها كان بترتيب إلهي ان التربية دي تبقى في القصر ، وكانت باشراف الهي منذ اللحظة الأولى
كان سيدنا موسى بينام يوم في قصر فرعون ، ويوم في بيوت بني اسرائيل القديمة
فيعرف ازاي يتعامل مع الملوك ويعرف طباعهم وأسلوب حياتهم ، ويعرف ازاي يتعامل مع الفقراء كأنه واحد منهم
فينشأ بعقلية قائد متوازنة ... مش بس عقلية شافت اختلاف الثقافات لكن كمان عاشتها
-----------------------------------✨✨✨✨
أول صفة من صفات القائد هي الرحمة ....
قائد بلا رحمة هيكون طاغية ظالم ، حتى لو قائد عظيم ...
شاف سيدنا موسى الحب والحنان من أمين في نفس الوقت ....
عاش سيدنا موسى أول سنتين من عمره لحد ما أتم الرضاعة بين أمه الحقيقية " يوكابد " ... وأمه بالتبني " آسيا " زوجة فرعون
تخيل أم اتحرمت من ابنها ، وخدوه منها ، وقلبها وجعها عليه ، والألم كان بيعصرها عصر .... هتعمل ايه لما ابنها يرجع لحضنها تاني ؟؟!!
طبيعي انها تقدمله حب وحنان واحتواء عشر أضعاف الطبيعي
وتخيل واحدة اتحرمت من الخلفة ، وتحت ايدها طفل جميل اتبنته واعتبرته ابن ليها ، وزوجة فرعون تحت ايدها خير الدنيا كله ، هتعمل ايه مع الطفل ده ؟؟
أكيد هتقدمله كل الحب والاهتمام والدلع اللي في الدنيا ...
يكفيه انه اتربى على ايد سيدة اعتبرها النبي عليه الصلاة والسلام واحدة من أعظم نساء العالمين ....
اللي يكفيها تكريمها في القرآن : ( وَضَرَبَ الله مَثَلاً لِّلَّذِينَ آمَنُواْ امرأت فِرْعَوْنَ إِذْ قَالَتْ رَبِّ ابن لِي عِندَكَ بَيْتاً فِي الجنة وَنَجِّنِي مِن فِرْعَوْنَ وَعَمَلِهِ وَنَجِّنِي مِنَ القوم الظالمين )
-----------------------------------✨✨✨✨
تاني صفة من صفات القائد هي العقل المستنير ....
زي ما المثل بيقول ( التعليم في الصغر كالنقش على الحجر )
شاء ربنا سبحانه وتعالى ان الطفل موسى يتلقى تعليمه في قصر فرعون ....
وفي القصر هيتلقى تعليم أمه مكنتش هتعرف توفرهوله خارج القصر ... زي الفرق بين تعليم الأغنياء وتعليم الفقراء دلوقتي
كأنك بتسفر ابنك بره وبتصرف عليه نص مليون في السنة بحسبة النهارده عشان يتعلم تعليم ينفعه ويصنع شخصية قيادية مستنيرة في المستقبل ...
في الوقت ده كان الفراعنة متفوقين في شتى أنواع العلوم ، فأمرت آسيا أمه بالتبني انها تجيبله أفضل معلمين في البلد يعلموه العلوم دي ...
وده ساعد بعد كده انه يقود بعقله القائد المستنير جموعرمن الفقراء الجهلاء .....
التعليم اللي هيديله قوة بعد كده يتعامل ازاي مع فرعون نفسه ... فالمتعلم له نفس حرة
-----------------------------------✨✨✨✨
تالت صفة من صفات القائد هي القوة البدنية ....
وكان من صفات القصور وقتها تعليم أولادهم تمارين رياضية قوية تخليهم مميزين وأقوياء عن باقي المصريين..
-----------------------------------✨✨✨✨
رابع صفة من صفات القائد هي الشجاعة ....
لحد ما وصل سيدنا موسى 8 سنوات كان بيزور مرضعته كتير ( اللي هي أمه ) ، وده كان طلبها من آسيا بحجة انها اتعلقت بيه ....
في الفترة دي بدأ يسمع من الناس إن آسيا زوجة فرعون مش أمه الحقيقية ، وانهم لقوه في النيل بين أشجار القصر ...
فراح لأمه بالتبني يسألها مين أمه الحقيقية ؟!
فجاوبته انها متعرفش
وأمه (يوكابد) اللي بتشوفه علطول مينفعش تقوله الحقيقة أنها هي أمه ، لإنه لسا صغير وخاف يكتر كلامه زي باقي الأطفال ، ففضل ميعرفش مين أمه في السن الصغير ده ، فاتصنعت بيد الله نفس شجاعة سوية تتحمل صدمات الحياة بعزة نفس .
-----------------------------------✨✨✨✨
خامس صفة من صفات القائد هي التربية على القدوة والمثل الأعلى ....
لما سمحت "آسيا" للطفل موسى بزيارة مرضعته وهو في سن صغيرة ، فضل سيدنا موسى يحبهم ويتعلق بيهم لحد ما نشأت علاقة قوية بينه وبينها ، وبينه وبين إخوته هارون ومريم ابنة عمران ....
وبدأ يحس براحة في بيوت بني إسرائيل أكثر من اللي بيحسها في قصر فرعون ...
ففرعون بيكرهه ولولا (آسيا) مكنش فضل هناك .....
ربنا أراد بكده انه ينشأ جواه حب لبني إسرائيل وفي نفس الوقت يتعود على حياتهم من صغره فميحسش بغربة بينهم بعد كده ....
ده خلى أمه "يوكابد" عايزة توصل الصلة أكتر ، ففضلت تحكيله كل مرة قصص عن سيدنا "يوسف" عليه السلام ،
وده ذكاء منها عشان اختارت شخصية تاريخية ورمز تاريخي محبوب عند المصريين كلهم ، حتى لو راح للقصر واتكلم عن سيدنا "يوسف" محدش هيتضايق ،
لانه شخصية تاريخية محبوبة حتى لو من بني إسرائيل ...
بكده الأم العظيمة نمت عند سيدنا موسى حبه لبني إسرائيل .... بتمهد عشان تقوله بعد كده إنه منهم ،
وبتغرس جواه صفة القدوة والمثل الأعلى اللي يقتدي بيه لما يكبر عشان ميبقاش زي فرعون ....
وبكده سيدنا موسى كان مثله الأعلى سيدنا يوسف ،
اللي زاد حبه ليه ولمرضعته لما قالتله إنه من أجدادها .....
-----------------------------------✨✨✨✨✨
سادس صفة من صفات القائد هي المرونة والتوازن ....
لما كبر سيدنا موسى ووصل سن البلوغ ....
جه اليوم المناسب اللي أمه قررت تقوله السر من غير خوف ...
في لحظة المصارحة دي سيدنا موسى سألها ليه خبت عليه كل ده ؟؟
قالتله انها مكنش عندها أي طريقة تانية عشان تنجيه من القتل على ايد فرعون إلا بالقائه في النيل ، وان ده وحي من ربنا سبحانه وتعالى ....
وان ربنا طمنها بانه هيرجع ليها ، وانك يا موسى هتبقى من المرسلين وصاحب رسالة وهدف عظيم ....
فأي قائد عظيم لازم تبقى ليه رسالة عظيمة ...
وقالتله انه لازم يرجع قصر فرعون عشان ميقتلهاش ويقتله لو فرعون عرف الحقيقة دي ...
فنشأت في موسى الشاب صفة المرونة والتوازن ..
يرجع يعيش في قصر فرعون اللي بيقول ( أنا ربكم الأعلى) ... وألا يعيش بين أمه الحقيقية واخواته ....
قرر سيدنا موسى عشان الرسالة العظيمة يكمل باقي تعليمه ونشأته في القصر وهو كاره وسط فتن ومصائب القصر واحتمال تعرضه للأذي ... ودي صفة أصقلتها العيشة في القصر والتعليم اللي اتعلمه وأكسبه النضوج ...
الرسول عليه الصلاة والسلام قال " المؤمن الذي يخالط الناس خير من المؤمن الذي لا يخالطهم ولا يؤذونه" ...
اتعلم سيدنا موسى الموازنة بين شيء فيه المفسدة والمصلحة في نفس الوقت .. ويصمم يحصل على الفايدة من غير ما يتأثر بالمفسدة ..
دي صناعة الله سبحانه وتعالى ... اللي هيأته يبقى قائد عظيم ...
( وَلَمَّا بَلَغَ أَشُدَّهُ وَاسْتَوَى آَتَيْنَاهُ حُكْمًا وَعِلْمًا وَكَذَلِكَ نَجْزِي المُحْسِنِينَ )
اللهم اجعلنا من عبادك الصابرين ، وعبادك المحسنين 🙏🙏
🍀🍀🍁🍁🍁🌼🌼🌼
هيحصل ايه بعد كده ؟؟!!
هيقابل سيدنا شعيب ازاي ؟؟
ولحظة لقائه بربنا سبحانه وتعالى ، وأول مرة يتكلم فيها مع ربنا سبحانه وتعالى كانت ازاي ؟؟
ايه اللي هيحصله بعد ما يكلم ربنا ؟؟ هيقرر يعمل ايه ؟؟
ده اللي هنعرفه في الفترة التانية من حياة سيدنا موسى إن كان في العمر بقية ⏱ .... وإلى اللقاء
#كتابة_علي_سلام
🍀🍀🍀🍁🍁🍁🌼🌼🌼
المصادر :
* كتاب قصص الأنبياء المسمى بعرائس المجالس
* البداية والنهاية
* قصص الأنبياء لابن كثير
#كتابة_علي_سلام
#نقص_عليك_من_أنباء_الرسل_ما_نثبت_به_فؤادك
#واقصص_القصص_لعلهم_يتفكرون
#النبي_الخامس_عشر
#سيدنا_موسى
#قصة_نبي
No comments:
Post a Comment