طريقة الفايش الصعيدي على اصوله

 الفايش الصعيدي من المخبوزات التي يشتهر بها أهل الصعيد، وهي وجبة تقدم في الإفطار مع كوب الحليب الطازج الساخن، حيث أنها مغذية وصحية فليس بها سكر كيسكويت، ولا بيض، ولذا فهي صحية للتخزين أيضا، ولكن لها طقوس لنجاحها، ولسوف أقدم لكم أدق تفاصيلها لتخرج معك احلى والذ فايش وبالهنا.

طريقة الفايش خطوة بخطوة وجميع تكاته

*لعمل 2كيلو

(1)خميرة اللبن والحمص

-كوب لبن مغلي طازة لسه جاي 

-3ملاعق كبيرة حمص مطحون

-ملعقة كبيرة سكر

نجهز برطمان زجاج نحط فيه الحمص والسكر وعليهم كوب لبن مغلي ونقلب بسرعة ونقفل البرطمان كويس ونلفه بفوطه ونحطه في مكان دافئ وضلمه بتقعد12ساعة في الحر أول ما تفتحيها الغطا بيعمل صوت طرقعة وبيكون ع الوش فقاقيع ورغوة بتبان خمرانه بعد كده نحط معلقتين كبار دقيق وشوية مياة دافئة ونقلبهم وتغطي البرطمان تاني ونرجعها مكانها تخمر ساعة

(2)خميرة ال نص كيلو دقيق

نحط شوية مياة دافية في حلة وعليهم نص كيلو دقيق ونقلب فيهم كويس بإيدينا الاتنين هي بتكون عجينة سايله زي عجينة الزلابية لا ثقيلة اوي ولا خفيفة اوي وبعدين نحط عليها خميرة اللبن والحمص ونقلب كويس بايدينا الإتنين لو ظهر فقاقيع ع وش العجينة تبقي ناجحة نغطيها ونسيبها في مكان دافئ وياسلام لو مكان مشمس تخمر معاكي بسرعة في اقل من ساعة 

(3)خميرة الفايش

* المقادير

'''''''''''''''''

-كيلو ونص دقيق (ومننساش ال نص كيلو بتاع الخميرة )كده إجمالي 2كليو دقيق

-نص كيلو لبن دافئ  (كوبايتين مليانين)

-نص كيلو سمن دافئ  (كوبايتين مليانين)

-نص كوب سكر

-نص كوب سمسم محمص

-ملعقة كبيرة كركم

-ملعقة كبيرة محلب

-ملعقة صغيرة ملح

-كيس كيك شيف

*الطريقة *

""""""""""""

نجهز طبق بلاستيك ونحط نص كمية اللبن وعليهم السكر والكركم والسمسم والملح والمحلب ونص كمية السمن ونقلبهم كويس جدا لحد م السكر والكركم وكل المكونات تذوب مع بعض وبعدين نحط الخميرة اللي خمرت ب نص كيلو دقيق وبعدين نحط كيلو ونص دقيق وكيس كيك شيف ونعجن فيها كويس جدا لحد م تلم شوية وبعدين نحط باقي كمية اللبن ونعجن حوالي (10) دقائق لحد ما يكون ملمسها ناعم ونحط في الآخر باقي كمية السمن الخطوة دي بتخليه هش وحلو ونعجن فيها لحد ما تتلم لمدة نص ساعة ونغطي وشها بشوية من السمن ونسيبها تخمر من ساعة ونص لساعتين في الحر وبعدين نشتغل بيها ونصبع واحدة واحدة ونجهز طبق فيه شوية زيت ندهن ايدينا منه مع كل واحدة هنصبعها ونرص في صاج مدهون زيت ونحط الصوابع جنب بعض مفيش مسافة وفي الآخر بعد ما نخلص ندهن ايدينا كويس بالزيت ونمشيها ع الصوابع من فوق براحة خالص ونسيبها تخمر من ساعة لساعةونص ونكون مسخنين الفرن قبل م تدخل بربع ساعة وبعدين ندخلها ع نار عالية وأول م ياخد لون من الجناب نهدي النار ونشغل الشواية ياخد لون من فوق ونطلعه ونسيبه يبرد وبعدين نقطعه ونفرده ع قماشه تحت المروحة عشان يبرد بسرعة ونرصه تاني في الصاج وندخله الفرن على نار هادئة جدا عشان يتحمص ويستوي مظبوط ولما ينشف من تحت نقلبه علي الناحية التانية وبألف هنا عليكم ياقمراات😍😍